chehra

muskurata  sharmata chamakte chand ki yaad dilata , raat ki kaali badri sa kaajal , gheenu ke sunhere rang sa chamakta ,uska ruhaani chehra . jitna hi dekhta hoon utna hi sochta hoon ki kuch to kahin to kaise to kuch bhi to kerke us shrishti kerta ne apni khwahish ko anjaam diya us chand ko taraashker.
 shankh jaisi aankhen jo khud ek sur mein apni dastaan bayan ker deti hai , waiz ki sab dastaan wahin ki wahin ruk jaaye , aur jin se bhi nazar mile woh nazarein fir kahin aur na jaaye , insaano mein milne wali pariyo ke nayan ki yeh adbut samaanta hai, inhe sawara nahi gaya, sajaya nahi gaya , kritrim roop se badla nahi gaya, yeh ajooba kayanat ki hi ek dein hai , yeh aankhen tumhari woh suna deti hai hazaro dastaan jo kabhi huwi hi nahi , jo shayad kabhi hongi bhi nahi , jo shayad tumhari matsya numa hontho se kabhi chalki bhi nahi hogi, woh kahani jo na ho ke bhi poori ho jaati , magar us chehre ki chakachaund mein kahin gum ho gayi. tumhare hontho se nikalne wala her ek lafz jo shahed sa meetha hai , her ek boond us shahed ki humne apne se door karti jaati hai, aur kho jaati hai humari hasti us chehre mein kahin. poochne per ki sundarta ka raaz kya hai , jawab aata to hai, per madhosh uski ada mein kabhi kaano tak pahaunch nahi paata. her ek shabd jo chalakta hai un ke muh se, kuch is tarah se rooh se milta hai jaise ek aushadh lagbhag mrit vyakti ko somras pila raha ho, kuch is tarah tera saath hai mere ki meri tar tar si jo roh thi , is prakaar theek hoti ja rahi hai ki jaise usse chikitsa ki kabhi zaroorat hi nahi. tere us chehre ke saath ek umar humne kayanat ke jannat, swarg ya abhor satya se pare le jaati hai , jo us ko dekh ke hum kehte hai ki agar hai kahin roohani shakti , jo ker sakti hai sab sahi , hai woh yahin. dekh zara aye humdum , dekh us pari ke chehre ko meri aankho ke aaine mein ... 

sikka

bikharta  machalta chalakta , toot ke fir se banta huwa , kabhi khushi mein dooba to kabhi gum mein gungunata , bister ke sirhane baithe us takiye ki tarah pichakta huwa , kabhi gaadi ke toote sheeshe se aankh mein chubta sooraj sa , to kabhi garmi mein subah ki suhani dhoop ki tarah , kabhi haath mein lagey tel samaan fisalte lamho ki tarah , to kabhi gond ki tarah jism se chipki un yaado ki tarah , paani ki tarah her sateh se milta huwa, ya holi ke rang ki tarah sabko ek rang kerta huwa , apni hi akad mein , apne hi shaurya mein , apne hi guroor mein , samman mein , adhikaar mein , ikhtiyaar mein aur sanshept mein kahiye to apne hi aks mein khelta hoon yeh sikka. kismat ka kahiye , paise ka kahiye ya aap ki aur meri takdeeer ka ... chalta hi rehta hai .
sahema huwa , mashoor hota huwa to kabhi badnaam hota huwa , kahin andheri galiyo mein lagbhag bhooji huwi kirano mein , tez roshini mein apna johar dikhata huwa , kahin duniya ki daud mein sabse balwaan , to kahin rishto ki dor mein sabse peeche , kahin zameen per rengte keede se reshm banata huwa to kahin aakash mein udte gidh se apni hasti bachata huwa , kahin toofano mein adig khada to kahin raat ke saanate mein madham si aahat mein maut ki kaaya pehna yeh sikka ... yahin reh jaata hai ... na hum mein se koi iska saga huwa , na yeh kisi ka ...